التفاهة تتحدي الملل وتخرب عقول شباب الامة

ميلودي

بصراحة ميلودي تعتبر من أحلى القنوات الى كتير مننا
يحب يتفرج عليها بس جميلة ورائعة جدا وربنا يكرم صاحبها ويوفقهم ويعرو لنا أجمل الفيديو كليبات وياريت يتوصوا شوية بالاغانى الروشة لزوم الافتكاسات والافلامة

تعتبر ميلودي ضمن قائمة القنوات المفضلة لدي العديد من الشباب مين فينا مش بيسمع ميلودي

بصراحة هي قناة بتساند الأخلاق وتدعو إلى ترك الأخلاق الحميدة والتمسك بأخلاق حمادة

يعنى الفيديو كليبات جميلة وكمان أصوات المطربين والمطربات والذوق الفني الرفيع

والله أوفر من أن الواحد يمسك الرويموت ويتوجه للقمر الأوربي اهوه جبنا لك الانحراف لغاية عندك وأنتا عيش بقى

الفن العربي في تقدم

طب إيه رأيكم في الأفلام ؟

بصراحة برضه مش كلها يعنى في وفيه بس الجميل إن الوحش يغطى على الحلو والسيئة بتعم والحسنة بتخص

يعنى نسبة كبيرة من الأفلام كلها حب وغرام وبتنجان وكوسة والله ينور وبتدخل السينما وبتكسب ملايين

نسبة كبيرة من الأفلام العربية الأيام دي مالها ش لزمة بس أظاهر كده أن رزق الهبل على المجانينأسف على الكلمة دي

مش عارف كل ما أتفرج على فيلم واندمج معاه لازم ألاقى أتنين بيحبوا بعض طب مافيش أتنين بيكرهوا بعض .

أنا بطلت أروح السينما وأشوف الأفلام لأني عرفتها من الإعلان بتعها ومن كمان الفيديو كليبات إلى بقت بتنزلها على القناة الموقرة ميلودي

سيبك ياعم من الأفلام أنتا ماسك فيها ليه خليك في الأغاني ؟

بصراحة المطربين بقوا بال كيلوا كل يوم مطرب جديد يعنى مش حا تزهق على رأى الحج ميلودي (ميلودي يتحدى الملل)
المشكلة أن الاغانى سمك لبن تمر هندي كلام على شوية خبط وترزيع على مطرب واقف وسط بنات أو مطربة واقفة وسط أولاد وكله تمام وبقى عندك أحلى فيديو كليب .

موضوع مش حا ينتهى وحرب على الفيديو كليبات مش حا تنتهى المشكلة ان القنوات دي إلى بتمولها شركات كبيرة
يعنى اعلانات كوكاكولا وبيبسي مش بتفارقها

ياعم أنتا عاوز مننا إيه ما تخلينا عايشين يعنى أنتا بتقولنا ما تتفرجوش على الافلام ولا تسمعوا اغانى خليكم قاعدين اسمعوا الردايو .......... انتا وحش احنا مش بنحبك

يا حبايب قلبي ممكن تسمعوا أغاني بس أغاني كويسة مش كل ألاغاني هابطة ونسبة كبيرة مننا بتسمع أغاني سواء برضاها او غصب عنها فى أغاني فعلا تستاهل أن هي تتسمع لأن بيبقى فيها كلام جميل ومعانى كتيرة
بس مش معنى كده انى ابقى ماشى فى الشارع الاقى واحد ماشى وعمال يغنى اتحنطر وترجن ترجن على رأى المطرب العظيم سعد الصغير .
تخيل أنتا شكلك وأنتا ماشى وعمال تتحنطر
شاب المفروض يكون قدوة لكل الشباب إلى اصغر منه والى فى سنه وعمال يغنى اتحنطر واتنطط .

الأغاني والفيديو كليبات أصبحت كالفيروسات على عقول شبابنا إلى كان ب يضرب بهم الأمثال والحكم بقى ب تضرب بيهم التفاهة والسذاجة .
تعالو نعمل( سكان) فحص داخل أنفسنا ونطلع كل الفيروسات إلى مالها ش اى لزمة ونحاول نجدد ونغير أسلوب حياتنا
امسك الريموت وقول انا حا شيل القناة دي ومش حا تفرج عليها اقف مع نفسك

ويا سلام لو بدأت تفتتح يومك بشوية قرأن دور وشوف قاريء تحب تسمعه

وبدل ما (mp3) كله أغاني وخبط وترزيع جرب وحط فيه درس مفيد لحياتك او شوية قرأن تسمعهم وانتا ماشى في الطريق وبكده تاخد بكل حرف حسنة والحسنة بعشرة أمثلها تخيل لو أنتا مت وأنتا بتسمع قرأن في إلام بي ثري أو إلام بيفور تخيل ثوابك عن ربنا حا يكون اد ايه ؟

انا والله ولا هربان من العصور الوسطى ولا ملاك
انا شاب زيكم تمام كل المؤثرات دي حوليا بس بحاول انى ابعد عنها ونفسي تبقوا كلكم معايا ........
يلا بينا نغير فى حياتنا ادخل واشوف واسمع واعرف دينك دور مواقع كتيرة عاوزاك تقراها وتشارك فيها اسمع الى حواليك بلاش تظلم نفسك اكتر ماهى مظلومة .

تبعوني وشاركوني أنا إن شاء الله حا جبلكم كل الى انتوا
عاو زينه اكتب اى موضوع ونناقش بعض كل واحد فينا فى مشاكل فى حياته تعالوا نشارك بعض .